Kikwete kama meli inazama tosa mizigo baharini

Kikwete kama meli inazama tosa mizigo baharini

Na Julius Magodi

KUNA simulizi moja inayoeleza adha za usafiri wa majini. Simulizi hii inamwelezea Nahodha wa meli ya Mfalme jasiri aliyetumia busara kuinusuru meli kuzama wakati ilipokumbwa na dhoruba kali ikiwa katikati ya bahari.
Meli hiyo pamoja na mizigo ya wafanyabiashara wengine ilikuwa na sanduku lililokuwa na madini na vitu vingine muhimu vya Mfalme wa nchi yake ambavyo alitoka kuvinunua nchi za mbali.
Nahodha huyo baada ya meli yake kukumbwa na dhoruba kali na kuanza kuzama aliamua kuipunguza baadhi ya mizigo kwa kuitupa baharini ili kupunguza uzito na meli isizame.
Aliwaamuru wafanyakazi wa meli hiyo kuanza kuitupa bahari mizigo hiyo, na katika harakati ya kuitupa mizigo hiyo, bahati mbaya, walitupa na lile sanduku la Mfalme.
Baada ya kupunguza mizigo meli ilirejea katika hali yake ya kawaida na baada ya muda dhoruba iliisha wakaendelea na safari yao hadi nyumbani.
Hata hivyo, mtihani mkubwa uliokuwa ukimkabili Nahodha huyo ni jinsi atakavyoeleza mpaka eleweke kwa Mfalme ambaye mizigo yake hiyo aliisubiri kwa miaka mingi mno.
Alijua hata mwelewa achalia mbali wafanyabiashara wengine waliokuwa na mizigo ambayo ameitupa baharini kunusuru meli kuzama.
Alipofika alikwenda kumwelezea Mfalme kilichotokea mpaka mizigo yake kuzama baharini. Mfalme alikasirika sana kusikia habari hiyo, lakini baada ya kutafakari sana aliona Nohodha wake alifanya jambo la busara kuitosa mizigo ili kunusuru meli kuzama.
Vile vile, hata wafanyabiashara waliokuwa mizigo yao imetupwa mabaharini ingawa walisikitika kupata hasara, nao walikubaliana na uamuzi huo kwa kujua kwamba kama meli ingezama wangekosa chombo cha kutumia kusafirisha mizigo yao.
Hatua ya Rais Jakaya Kikwete wiki hii kumteua Mbunge wa Kigoma Kaskazini (Chadema), Zitto Kabwe kuwa miongoni mwa wajumbe wa Kamati ya kupitia upya mikataba ya uchimbaji wa madini nchini, ninaweza kuifananisha na busara za Nahodha wa Meli ya Mfalme ya kuamua kutosa mizigo ili meli iendelee.
Nafananisha hatua hiyo na busara za nahodha wa meli, kwa sababu tangu Rais aingie madarakani miaka karibu miwili iliyopita hajaweza kuibuka kupigana na maamuzi yaliyotolewa na watu waliopo katika serikali na chama chake.
Nasema hivyo kwa sababu mara baada ya Zitto kupewa adhabu ya kusimamishwa ubunge, viongozi wa CCM walichukulia kitendo hicho kama hoja yao ya jukwaani kumlaani mbunge huyo na kueleza kuwa mambo yalikuwa shwari katika sekta ya madini.
Labda nikumbushe tu kwamba kamati ya akina Zitto itakuwa na kazi ya kuchambua mfumo wa kodi unaotumika katika sekta ya madini na kupitia mfumo wa usimamizi wa shughuli za uchimbaji mkubwa unaofanywa na serikali.
Uamuzi wa kuundwa kwa Kamati hiyo unafuatia hoja binafsi ya Zitto Kabwe aliyoitoa bungeni kutaka kuundwa kwa Kamati Teule ya kuchunguza mazingira ya kusainiwa kwa mkataba wa mgodi wa dhahabu wa Buzwagi nchini Uingereza na Waziri wa Nishati na Madini, Nazir Karamagi Februari mwaka huu pamoja na kupitiwa upya sheria ya madini kwa ujumla.
Baada ya kuwasilisha hoja hiyo, Kabwe alifungiwa kuhudhuria vikao vya Bunge hadi Januari mwakani. Hatua hiyo ya Bunge iliibua mjadala mkubwa miongoni mwa makundi mbalimbali ya jamii, wakihoji sababu za kumfungia mbunge huyo kijana.
Kwa hakika, hatua ya kumteua Zitto kuingia katika kamati hiyo ni kuliambia bunge kwamba halikuwa limetenda sahihi kumfungia kijana huyo kwa hoja yake ya kutaka kuundwa kwa tume ya kuchunguza mkataba wa Buzwagi na sheria ya madini.
Pia hatua hiyo ni mwanzo wa kuanza kukataa baadhi ya maamuzi ambayo yatolewa kwa misingi ya kisiasa badala ya kuangalia maslahi ya nchi.
Uamuzi wa kumpa adhabu Zitto ulionekana kuwa jambo la kisiasa zaidi kuliko kuangalia ukweli, wabunge wa CCM ndio walionekana kuweka msimamo wa kumbana zaidi mbunge huyo.
Rais Kikwete nadhani ameichukua hatua hii akiwa anakumbuka jinsi ambavyo umaarufu wake ulivyoporomoka ghafla tangu aingie madarakani kutokana kuzingirwa na mawaziri na watendaji wengine mafisadi.
Watu walijaribu sana kumshauri Rais Kikwete mapema kwamba akitaka kufanikisha kile anachotaka kuwafanyia watanzania, basi hana budi kuvunja urafiki na watu ambao wanajiita watu bora waliokaribu naye ambao wanafanya mambo yasiyofaa kwa kivuli cha urafiki na rais.
Hata hivyo, kama anaweza bado anayo nafasi ya kurekebisha mambo yakaenda. Kuna uvumi ulioanza kuenea mitaani kutoka kwa watu wanaojiita wako karibu na rais kwamba huenda akafanya mabadiliko baraza lake la mawaziri. Kama ni kweli basi huo ni uamuzi wa busara, lakini ninachoweza kumashauri ni kwamba atose mawaziri ambao ni mizigo na sio maboya.
Atumie busara kama alizozitumia Nahodha wa Meli ya Mfalme kutosa mizigo mizito na kuacha ile mepesi inayobebeka ili meli yake iende.
Nasema hivyo kwa sababu inawezekana kabisa Kikwete akafanya mabadiliko ya baraza lake la mawaziri lakini akasikia uchungu kuwatupa mawaziri marafiki zake, na kuwatupa nje watendaji wazuri ili tu aonekane kafanya mabadiliko.
Kama atafanya hivyo ni wazi kwamba utawala wake utakuwa mgumu sana kutokana na kuendelea kuwa na watu katika timu yake wasiokuwa na msaada, badala yake watazidi kumharibia.
Mwandishi wa safu hii ni mhariri wa habari maalum. Anapatikana kupitia baruapepe; juliusmagodi@yahoo.com. 0754 304336
Tuma maoni kwa Mhariri

Richard: Lazima nimrudishe mke wangu

RICHARD Bezuidenhout, ambaye ni mshindi wa shindano la Big Brother Africa II amesema changamoto kubwa analokabiliana nalo kwa sasa ni kurudiana na mkewe Ricky.
Alisema atahakikisha anaokoa ndoa yake. Richard, ambaye amejinyakulia kitita cha zaidi ya Sh milioni 130 kwa kuwa mtu wa mwisho kutoka kwenye jumba la Big Brother jijini Johannesburg, Afrika Kusini, aliwaambia waandishi wa habari kwa masikitiko kuwa moja ya changamoto zinazomkabili kwa sasa ni suala la mkewe ambaye alilazimika kurejea kwao Canada baada ya kukerwa na vitendo vya mshiriki huyo Mtanzania.
Akiwa katika jumba hilo, Richard alikuwa na uhusiano mkubwa na mshiriki toka Angola, Tatianna, uhusiano uliovuka mipaka ya urafiki wa kawaida na wawili hao kujikuta wakidondoka kwenye penzi zito na matendo yao kuonyeshwa moja kwa moja na televisheni ya M-net kama ilivyo kanuni za shindano hilo.
"Kwa sasa watakaoniponda, ndio changamoto langu na hasa mke wangu ndio changamoto kubwa kwangu," alisema Richard katika mkutano na waandishi wa habari uliojaa mabishano kutokana na wenyeji wake, Multi Choice kushauri maswali juu ya maisha yake, mkewe na Tatianna yasiulizwe sana.
Hata hivyo Richard, hakuonekana kujutia kile alichokifanya wakati akiwa kwenye jumba hilo kwa siku 98 licha ya kujua kuwa alikuwa akiangaliwa na Afrika nzima, Tanzania, familia yake na mkewe Ricky kupitia kituo cha malipo cha M-Net.
"Mimi niliyeingia humo ndiye ninayejua hali ilivyo, si rahisi," alisema Richard. "Hata ingetokea kuwa narejeshwa kwenye jumba la Big Brother, ningefanya vile vile. Sio wengi ambao wanaweza kuelewa hali hiyo... mimi ndio naelewa na naweza kueleza hali inakuwaje... Yale niliyoyafanya, nilifanya kwa sababu ya mazingira ya kwenye jumba hilo.
"Lakini nasema kuwa nitajitahidi sana; nawaahidi katika mambo yatakayotokea kwa sasa ni kumrudisha mke wangu."
Akizungumzia uhusiano wake na Tatianna, Richard alisema tena kuwa ulitokana na maisha ya kwenye jumba hilo na wala si mkakati wake wa kushinda na kutwaa kitita hicho kikubwa na cha kwanza kikubwa kwa mshindani wa mashindano ya burudani kukinyakua nchini.
"Uhusiano wangu na Tatianna haukuwa mkakati wangu wa ushindi," alisema. "Kwanza sikujua kama ningekutana na Tatianna; wote tulikutana humo humo kwa hiyo isingekuwa rahisi kupanga naye.
Ushindi niliupata kutokana na jinsi nilivyo. "Mimi ni mtu huru, ni muwazi, na mtazamo wangu ni ule ule, freestyle ndio Richard... niliishi kama ninavyoishi."
Richard hakuonekana kuwa tofauti na jinsi alivyokuwa akionekana kwenye televisheni wakati wa shindano la Big Brother, lakini alifurahisha zaidi alipozungumza Kiswahili akirejea hali ilivyokuwa kwenye jumba la Big Brother.
"Kitu ambacho sikukipenda ni vile vikundi vikundi," alisema akizungumzia watu waliokuwa wakimteta.
"Wale watu walikuwa wanachonga sana; walikuwa wananiudhi sana. Walikuwa kama mademu (wanawake). Walikuwa wanaingilia sana maisha yangu; kila wakati walikuwa wanazungumzia uhusiano wangu na Tatiana, wakati wao nao walikuwa na videmu (wasichana wao) vyao.
"Tena ajabu, watu wengine walikuwa na midevu (ndevu), wana mimaso (macho), halafu eti wanakaa wananizungumzia mimi na Tatianna. Wao wana mademu zao, lakini ajabu wanakuwa wanazungumza zungumza pembeni... hata mademu zao walikuwa na wivu. Kwa kweli walikuwa wananiudhi sana."
Richard, ambaye baba wake ni chotara wa Kiholanzi na Kinyarwanda, alisema yeye ni Mtanzania halisi na si Mganda kama ambavyo imekuwa ikiandikwa na vyombo vya habari vya nchi hiyo.
"Mimi si Mganda," alisema. "Mama yangu ni Mzaramo na alizaliwa hapa hapa Dar es salaam. Lakini babu yangu, yaani baba wa baba yangu ni Mholanzi na alizaa na Mnyarwanda.
Baba na mama walikutana Uganda na baada ya matatizo ya (rais aliyepinduliwa wa Uganda) Iddi Amin, waliamua kurejea nyumbani na huku ndiko nilikozaliwa."
Richard alisomea shule ya Msingi Makumbusho na baadaye kujiunga na Mashujaa kabla ya kwenda Kampala, Uganda ambako alisoma darasa la tano hadi kidato cha sita na kurejea nchini ambako sasa anasomea utengenezaji wa filamu.